ଅଭିଯୋଗ ଶୁଣାଣିକୁ ବିଳମ୍ବରେ ଆସିଲେ ଅଧିକାରୀ: ଜିଲ୍ଲାପାଳଙ୍କ କଡା ପଦକ୍ଷେପ, ୧୨ଜଣ ସରକାରୀ ବାବୁଙ୍କୁ ବାହାରେ ବସାଇଲେ

ରାୟଗଡ଼ା ଜିଲ୍ଲା ପ୍ରଶାସନରୁ ଆଜି ଏକ ଦୃଢ଼ ଏବଂ ଉଦାହରଣମୂଳକ ପଦକ୍ଷେପର ଖବର ସାମ୍ନାକୁ ଆସିଛି।

ଜନସାଧାରଣଙ୍କ ଅଭିଯୋଗ ଶୁଣାଣି ପାଇଁ ଜିଲ୍ଲା ପରିଷଦ ସମିଳନୀ କକ୍ଷରେ ଆୟୋଜିତ କାର୍ଯ୍ୟକ୍ରମରେ ସମୟପାଳନ ନ କରିଥିବା ଅଧିକାରୀମାନଙ୍କ ପ୍ରତି ଜିଲ୍ଲାପାଳ କଡା ମନୋଭାବ ପ୍ରଦର୍ଶନ କରିଛନ୍ତି।

ନିର୍ଦ୍ଧାରିତ ସମୟରେ ଅଭିଯୋଗ ଶୁଣାଣି ଆରମ୍ଭ ହେବାକୁ ଥିଲା। କିନ୍ତୁ କିଛି ବରିଷ୍ଠ ଓ ଜିଲ୍ଲାସ୍ତରୀୟ ଅଧିକାରୀ ବିଳମ୍ବରେ କାର୍ଯ୍ୟକ୍ରମ ସ୍ଥଳରେ ପହଞ୍ଚିଥିଲେ। ଏହି ଅବହେଳାକୁ ଗୁରୁତ୍ୱ ଦେଇ ଜିଲ୍ଲାପାଳ ସମିଳନୀ କକ୍ଷ ଭିତରକୁ ପ୍ରବେଶ ନିଷେଧ କରିଥିଲେ ଏବଂ ସମୁଦାୟ ୧୨ଜଣ ଅଧିକାରୀଙ୍କୁ ବାହାରେ ବସି ରହିବାକୁ ନିର୍ଦ୍ଦେଶ ଦେଇଥିଲେ।

ବାହାରେ ବସାଯାଇଥିବା ଅଧିକାରୀମାନଙ୍କ ମଧ୍ୟରେ ରହିଛନ୍ତି— ରାୟଗଡ଼ା ଉପଜିଲ୍ଲାପାଳ ରମେଶ ଚନ୍ଦ୍ର ଜେନା, ଏସିଏଫ୍ ଅଶୋକ ପ୍ରଧାନ, ଡିଆରସିଏସ୍ ଜନ୍ମୟ ମହାପାତ୍ର, ଡିଏସଏସଓ ଶ୍ରୀକାନ୍ତ ପାଣିଗ୍ରାହୀ, ଜିଲ୍ଲା ଅବକାରୀ ଅଧୀକ୍ଷକ ସନ୍ତୋଷ ଧଳସାମନ୍ତ, ଜିଲ୍ଲା ଯୋଗାଣ ଅଧିକାରୀ ଦାଶରଥୀ ସରେନ, ଡିଆଇପିଆରଓ ବସନ୍ତ ପ୍ରଧାନ, ଡିଇଓ ଶ୍ୟାମଘନ ଭୁଇଁଆ, ବିଡିଓ ସୁଜିତ କୁମାର ମିଶ୍ର, ଜିଲ୍ଲା ଶିଳ୍ପ ଅଧିକାରୀ ଚିତ୍ତରଞ୍ଜନ ମଲିକ୍ ଏବଂ ଜିଲ୍ଲା ପଞ୍ଚାୟତ ଅଧିକାରୀ ସୂର୍ଯ୍ୟନାରାୟଣ ମହାରଣା।

ଅଭିଯୋଗ ଶୁଣାଣି ସମୟରେ ଜିଲ୍ଲାପାଳ ସ୍ପଷ୍ଟ କରିଥିଲେ ଯେ, ଜନସାଧାରଣଙ୍କ ସମସ୍ୟା ସହିତ ସମ୍ପୃକ୍ତ କାର୍ଯ୍ୟକ୍ରମରେ ସମୟପାଳନ ଓ ଦାୟିତ୍ୱବୋଧ ଅତ୍ୟନ୍ତ ଆବଶ୍ୟକ। ଅବହେଳାକୁ କୌଣସି ପରିସ୍ଥିତିରେ ମଧ୍ୟ ବର୍ଦ୍ଦାସ୍ତ କରାଯିବ ନାହିଁ ବୋଲି ସେ ଚେତାବନୀ ଦେଇଥିଲେ।

ଏହି ଘଟଣା ପରେ ଜିଲ୍ଲା ପ୍ରଶାସନିକ ମହଳରେ ଚର୍ଚ୍ଚା ଜୋର ଧରିଛି। ସାଧାରଣ ଲୋକମାନେ ମଧ୍ୟ ଜିଲ୍ଲାପାଳଙ୍କ ଏହି କଡା ପଦକ୍ଷେପକୁ ସ୍ୱାଗତ କରିଥିବା ଦେଖାଯାଇଛି।