ରାୟଗଡ଼ାର ବିଷମ କଟକରେ ମହାବିଷୁବ ଅବସରରେ ବିଷୁବ ମିଳନ

ରାୟଗଡ଼ା ଜିଲ୍ଲାର ବିଷମ କଟକ ବ୍ଲକ୍‌ରେ ପବିତ୍ର ମହାବିଷୁବ ପର୍ବ ଅବସରରେ ବିଷୁବ ମିଳନ କାର୍ଯ୍ୟକ୍ରମ ଭବ୍ୟ ଓ ଆନନ୍ଦମୟ ପରିବେଶରେ ପାଳିତ ହୋଇଯାଇଛି।

ଏହି ବିଷୁବ ମିଳନ କାର୍ଯ୍ୟକ୍ରମ ସ୍ଥାନୀୟ ବିଜୁ ପଟ୍ଟନାୟକ କଲ୍ୟାଣ ମଣ୍ଡପ ଠାରେ ଆୟୋଜିତ ହୋଇଥିଲା, ଯେଉଁଠାରେ ବହୁ ସଂଖ୍ୟକ ସ୍ଥାନୀୟ ଲୋକ, ସମାଜସେବୀ, ସାମ୍ବାଦିକ ଓ ବୁଦ୍ଧିଜୀବୀମାନେ ଉପସ୍ଥିତ ରହିଥିଲେ। ପୂର୍ବତନ UGB ବ୍ୟାଙ୍କ୍ ମ୍ୟାନେଜର୍ ଶଙ୍କର୍ଷଣ ଦାସଙ୍କ ନେତୃତ୍ୱରେ ଏହି କାର୍ଯ୍ୟକ୍ରମ ଶୃଙ୍ଖଳାବଦ୍ଧ ଭାବରେ ସଫଳତାର ସହିତ ଅନୁଷ୍ଠିତ ହୋଇଥିଲା।

କାର୍ଯ୍ୟକ୍ରମରେ ମୁଖ୍ୟ ଅତିଥିଭାବରେ ବାଳ ମୁକୁନ୍ଦ ପାଳ ଯୋଗଦେଇଥିବା ବେଳେ, ସମ୍ମାନିତ ଅତିଥିଭାବରେ ବରିଷ୍ଠ ଅବସରପ୍ରାପ୍ତ ଶିକ୍ଷକ ରାଧାକାନ୍ତ ପାଢ଼ୀ, ଅବସରପ୍ରାପ୍ତ କୃଷି ଅଧିକାରି ଅଜିତ କୁମାର ପାଢ଼ୀ, ବରିଷ୍ଠ ସାମ୍ବାଦିକ ଶିବ ପ୍ରସାଦ ପାଢ଼ୀ, ବରିଷ୍ଠ ସମାଜସେବୀ ସୁକାନ୍ତ କୁମାର ସେଠୀ,ବରିଷ୍ଠ ଅବସରପ୍ରାପ୍ତ ଶିକ୍ଷକ ଶଶୀ ମହାନ୍ତି, ଯୁବ ସାମ୍ବାଦିକ ଓ ସମାଜସେବୀ ଜବାବ ପାଲକା ଉପସ୍ଥିତ ଥିଲେ। ସେହିପରି ଡିଆଇଟି ସ୍କୁଲ୍‌ର ଛାତ୍ରଛାତ୍ରୀମାନେ କାର୍ଯ୍ୟକ୍ରମକୁ ସୁଚାରୁ ଭାବରେ ସଂଚାଳନ କରିବାରେ ସହଯୋଗ କରିଥିଲେ।

କାର୍ଯ୍ୟକ୍ରମର ଆରମ୍ଭରେ ମହାପ୍ରଭୁ ଶ୍ରୀ ଜଗନ୍ନାଥଙ୍କ ନିକଟରେ ପୂଜାର୍ଚ୍ଚନା କରାଯାଇଥିଲା। ପୁଷ୍ପାଞ୍ଜଳି ଅର୍ପଣ ସହ ଦୀପ ଓ ଧୂପ ପ୍ରଜ୍ଜ୍ୱଳନ କରି ଆନୁଷ୍ଠାନିକ ଭାବରେ କାର୍ଯ୍ୟକ୍ରମର ଶୁଭାରମ୍ଭ କରାଯାଇଥିଲା। ଏହି ସମୟରେ ପରିବେଶ ଭକ୍ତିମୟ ଓ ଶାନ୍ତିମୟ ହୋଇଯାଇଥିଲା।

ତାହାପରେ ଓଡ଼ିଶାର ଗୌରବମୟ ସଙ୍ଗୀତ “ବନ୍ଦେ ଉତ୍କଳ ଜନନୀ” ସମୁହେ ଗାନ କରାଯାଇଥିଲା, ଯାହାରେ ସମସ୍ତେ ଭାବବିଭୋର ହୋଇପଡ଼ିଥିଲେ ଓ ଉତ୍ସବର ମାହୋଲ୍‌କୁ ଆହୁରି ଉତ୍ସାହିତ କରିଥିଲା।

ପରବର୍ତ୍ତୀ କାର୍ଯ୍ୟକ୍ରମରେ ମଞ୍ଚାସୀନ ଅତିଥିମାନଙ୍କୁ ପୁଷ୍ପଗୁଚ୍ଛ ପ୍ରଦାନ କରି ସମ୍ମାନିତ କରାଯାଇଥିଲା। ସମ୍ମାନ ପ୍ରଦାନ ସମୟରେ ସ୍ଥାନୀୟ ଲୋକମାନଙ୍କ ମଧ୍ୟରେ ଖୁସିର ଲହରୀ ଦେଖିବାକୁ ମିଳିଥିଲା।

ତାହା ପରେ ଡିଆଇଟି ସ୍କୁଲ୍‌ର ଛାତ୍ରଛାତ୍ରୀମାନେ ମହାପ୍ରଭୁ ଶ୍ରୀ ଜଗନ୍ନାଥଙ୍କ ଉପରେ ଆଧାରିତ ଭଜନ ସଙ୍ଗୀତ ପରିବେଶନ କରିଥିଲେ, ଯାହା ଦର୍ଶକମାନଙ୍କୁ ଆକର୍ଷିତ କରିଥିଲା ଓ କାର୍ଯ୍ୟକ୍ରମକୁ ଆହୁରି ରଙ୍ଗିନ କରିଥିଲା।

ଶେଷରେ ବିଭିନ୍ନ ଅତିଥି ଓ ବକ୍ତାମାନେ ନିଜ ନିଜ ଅଭିଭାଷଣ ମାଧ୍ୟମରେ ବିଷୁବ ମିଳନର ଗୁରୁତ୍ୱ, ଓଡ଼ିଆ ସଂସ୍କୃତି ଓ ପରମ୍ପରାର ସୁରକ୍ଷା, ସମାଜିକ ସମ୍ପ୍ରୀତି ଓ ଏକତାର ଆବଶ୍ୟକତା ବିଷୟରେ ମତ ପ୍ରକାଶ କରିଥିଲେ।

ସମସ୍ତଙ୍କ ସହଯୋଗ ଓ ସକ୍ରିୟ ଭାଗିଦାରୀରେ ଏହି ବିଷୁବ ମିଳନ କାର୍ଯ୍ୟକ୍ରମ ସଫଳତାର ସହ ଶେଷ ହୋଇଥିଲା ଓ ଆସନ୍ତା ବର୍ଷ ଆହୁରି ବଡ଼ ପରିସରରେ ପାଳନ କରିବାକୁ ସଙ୍କଳ୍ପ ଗ୍ରହଣ କରାଯାଇଥିଲା। ରାୟଗଡ଼ା ଜିଲ୍ଲା ରୁ ଜବାବ ପାଲକା ଙ୍କ ରିପୋର୍ଟ ବିପ୍ଳବୀ ପରିକ୍ରମା