ରାୟଗଡ଼ା ଚନ୍ଦ୍ରପୁରରେ SOUTHCO ବିଦ୍ୟୁତ୍ ଅବହେଳା: ବିଦ୍ୟୁତ୍ ତାର ଆଘାତରେ ଦୁଇ ମୃତ, ଜୀବନ ଅସୁରକ୍ଷିତ

ରାୟଗଡ଼ା ଜିଲ୍ଲାର ଚନ୍ଦ୍ରପୁର ବ୍ଲକରେ SOUTHCO ଓଡ଼ିଶା ବିଦ୍ୟୁତ୍ ବିତରଣ ଲିମିଟେଡ଼, ରାଜ୍ୟ ବିଦ୍ୟୁତ୍ ବିଭାଗ ଓ ଜଙ୍ଗଲ ବିଭାଗର ଅବହେଳା ଆଜି ଏକ ଭୟାବହ ରୂପ ନେଇଛି। ଅବ୍ୟବସ୍ଥିତ ବିଦ୍ୟୁତ୍ ବ୍ୟବସ୍ଥା ଯୋଗୁଁ ସାଧାରଣ ଲୋକଙ୍କ ଜୀବନ ଚରମ ସଙ୍କଟରେ ପଡ଼ିଛି।

ଚନ୍ଦ୍ରପୁର ସହିତ ରାୟଗଡ଼ା ଜିଲ୍ଲାର ଅନେକ ଗାଁରେ ଖୋଲା, ଝୁଲୁଥିବା ଓ ଅସୁରକ୍ଷିତ ବିଦ୍ୟୁତ୍ ତାର ଦେଖିବାକୁ ମିଳୁଛି। ଏହା ଚାଷୀ, ଶ୍ରମିକ, ପଥଚାରୀ ସହ ବନ୍ୟଜନ୍ତୁ ଓ ହାତୀମାନଙ୍କ ପାଇଁ ମଧ୍ୟ ଜୀବନଘାତକ ସାବିତ ହେଉଛି।

ଆଜି ଘଟିଥିବା ଦୁଇଟି ଦୁଃଖଦ ଘଟଣା ସମଗ୍ର ଅଞ୍ଚଳକୁ ସ୍ତବ୍ଧ କରିଦେଇଛି। ପ୍ରଥମ ଘଟଣାରେ, ଚନ୍ଦ୍ରପୁର ସଦର ଅଞ୍ଚଳରେ ପିଚୁ ରାସ୍ତା କାମ ଚାଲିଥିବା ସମୟରେ ଜଣେ ଟିପର ଡ୍ରାଇଭର ଖୋଲା ବିଦ୍ୟୁତ୍ ତାର ସଂସ୍ପର୍ଶରେ ଆସି ଘଟଣାସ୍ଥଳରେ ମୃତ୍ୟୁବରଣ କରିଥିଲେ।

ଦ୍ୱିତୀୟ ଘଟଣାରେ, ହନୁମନ୍ତପୁର ଗ୍ରାମ ପଞ୍ଚାୟତର SBI ବ୍ୟାଙ୍କରେ କାର୍ଯ୍ୟରତ ପିଅନ ଅଜିତ ବିଅସ୍କା ଜଙ୍ଗଲ ଅଞ୍ଚଳକୁ ଯାଇଥିବା ବେଳେ ଅବୈଧ ଭାବେ ବିଛାଯାଇଥିବା ବିଦ୍ୟୁତ୍ ତାର ସଂସ୍ପର୍ଶରେ ଆସି ପ୍ରାଣ ହରାଇଛନ୍ତି।

ସ୍ଥାନୀୟ ଲୋକଙ୍କ ଅଭିଯୋଗ ଅନୁସାରେ, ବନ୍ୟଜନ୍ତୁ ଶିକାର ପାଇଁ ଜଙ୍ଗଲ ଭିତରେ ଅବୈଧ ଭାବରେ ବିଦ୍ୟୁତ୍ ତାର ବିଛାଯାଇଛି, କିନ୍ତୁ ଏନେଇ ବିଦ୍ୟୁତ୍ ଓ ଜଙ୍ଗଲ ବିଭାଗ କୌଣସି କଠୋର ପଦକ୍ଷେପ ନେଉନାହାନ୍ତି।

ଅଞ୍ଚଳବାସୀ ତୁରନ୍ତ ଉଚ୍ଚସ୍ତରୀୟ ତଦନ୍ତ, ଖୋଲା ବିଦ୍ୟୁତ୍ ତାର ହଟାଯିବା ଓ ଦୋଷୀ ଅଧିକାରୀଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଦାବି କରୁଛନ୍ତି।