ବିଷମକଟକରେ ଆରମ୍ଭ ହେଲା ୩୧ତମ ଜୁନିଅର ବାଳକ ଓ ବାଳିକା ରାଜ୍ୟସ୍ତରୀୟ ହ୍ୟାଣ୍ଡବଲ୍ ଚ୍ୟାମ୍ପିଅନ୍‌ସିପ୍–୨୦୨୬

ରାୟଗଡ଼ା ଜିଲ୍ଲାର ବିଷମକଟକ ମିନି ଷ୍ଟାଡିୟମରେ ଆଜିଠାରୁ ୩୧ତମ ଜୁନିଅର ବାଳକ ଓ ବାଳିକା ରାଜ୍ୟସ୍ତରୀୟ ହ୍ୟାଣ୍ଡବଲ୍ ଚ୍ୟାମ୍ପିଅନ୍‌ସିପ୍–୨୦୨୬ ଉତ୍ସାହ ଓ ଆନନ୍ଦର ସହ ଆରମ୍ଭ ହୋଇଛି। ଏହି ପ୍ରତିଯୋଗିତା ୧୮ ଜାନୁଆରୀରୁ ୨୦ ଜାନୁଆରୀ ୨୦୨୬ ପର୍ଯ୍ୟନ୍ତ ତିନି ଦିନ ଧରି ଚାଲିବ।

ଓଡ଼ିଶା ରାଜ୍ୟ ହ୍ୟାଣ୍ଡବଲ୍ ଆସୋସିଏସନ୍‌ର ଅଧୀନରେ ରାୟଗଡ଼ା ଜିଲ୍ଲା ହ୍ୟାଣ୍ଡବଲ୍ ଆସୋସିଏସନ୍ ପକ୍ଷରୁ ଏହି ରାଜ୍ୟସ୍ତରୀୟ ପ୍ରତିଯୋଗିତାର ଆୟୋଜନ କରାଯାଇଛି। ଏଥିରେ ଓଡ଼ିଶାର ୧୭ଟି ଜିଲ୍ଲାରୁ ଜୁନିଅର ବାଳକ ଓ ବାଳିକା ଖେଳାଳିମାନେ ଅଂଶଗ୍ରହଣ କରୁଛନ୍ତି।

ଆଜି ଅନୁଷ୍ଠିତ ଉଦଘାଟନୀ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ମାନ୍ୟବର ବିଧାୟକ ଶ୍ରୀ ନୀଳମାଧବ ହିକାକା ଉପସ୍ଥିତ ଥିଲେ। ସେ ଜଗନ୍ନାଥଙ୍କ ପ୍ରତିମୂର୍ତ୍ତିରେ ପୁଷ୍ପ ଓ ଧୂପ ଅର୍ପଣ କରି ଏହି ହ୍ୟାଣ୍ଡବଲ୍ ପ୍ରତିଯୋଗିତାର ଶୁଭାରମ୍ଭ କରିଥିଲେ।

ଏହି କାର୍ଯ୍ୟକ୍ରମରେ ଓଡ଼ିଶା ରାଜ୍ୟ ହ୍ୟାଣ୍ଡବଲ୍ ଆସୋସିଏସନ୍‌ର ସାଧାରଣ ସମ୍ପାଦକ ଶ୍ରୀ ମାନସ କୁମାର ସିଂ, ଆନ୍ତର୍ଜାତୀୟ ଖେଳାଳି ଓ କୋଚ୍ ଶ୍ରୀ ଗୌରୀଶଙ୍କର ମିଶ୍ର, ରାୟଗଡ଼ା ଜିଲ୍ଲା ହ୍ୟାଣ୍ଡବଲ୍ ଆସୋସିଏସନ୍‌ର ସାଧାରଣ ସମ୍ପାଦକ ଶ୍ରୀ ସୁଭେନ୍ଦୁ ନାରାୟଣ ଚୌଧୁରୀ, ଉପ-ସଭାପତି ଶ୍ରୀ ପ୍ରମୋଦ କୁମାର ପାଣିଗ୍ରାହୀ ସହ ନେତ୍ରାନନ୍ଦ ସତପଥୀ, ଅବନାନନ୍ଦ ନାୟକ, ରାଜେଶ କୁମାର ବିଶ୍ୱାଳ ଓ ଅନ୍ୟାନ୍ୟ ଅତିଥିମାନେ ଉପସ୍ଥିତ ଥିଲେ।

ତିନି ଦିନ ଧରି ଚାଲିବାକୁ ଥିବା ଏହି ରାଜ୍ୟସ୍ତରୀୟ ହ୍ୟାଣ୍ଡବଲ୍ ପ୍ରତିଯୋଗିତାକୁ ନେଇ ଖେଳାଳି ଓ କ୍ରୀଡ଼ା ପ୍ରେମୀମାନଙ୍କ ମଧ୍ୟରେ ବେଶ୍ ଉତ୍ସାହ ପରିଲକ୍ଷିତ ହେଉଛି।